صوت السكات بقلم /محمد توفيق
صوت السكات
-------------------------
صوت السكات
بيخنق الدمع بعنيه
والحلم مات
والامل لسه فاضله باقية
والذكريات
بوشحها لسود لفلفت كل البيوت
حتى الدروب
معدش فيها اى صوت
وغول بيهتف يابشر الحلم مات
الحلم مات
ملقيتش رد الا السكات
-----------
العنكبوت
عشش فى وسط الحنجرة من السكوت
والخوف تابوت
دافنى وسط المقبرة من غير ما أموت
عايز اكون...او ...لا اكون
رافض ياناس اعيش فى سجن من الشجون
نفسى بروحى انطلق من جوه جسمى
نفسى اتوه فى دنيا تانية وانسى أسمى
نفسى اكون ذى البشر ليه وطن
بس الغيلان مش عايزه تعرف اننا برضه بشر
نحب..نكره...نختلف...احنا بشر
-----------------
لسه الامل
فى ايد قوية بتتخلق من العدم
لسه امل
فى قوة جاية بتستمد القوة دى من الالم
لسة امل
مش القضية انى اعيش بين ناس بتاكل بعضها
من كترها ذى الغنم
ولا القضية انى اكون مرغوم ياناس
على الوجود او العدم
القضية القى نفسى
بين بشر بتعرف اسمى
وتعترف انى بشر
لا فيه فواصل ولا حدود
وتنتزع كل السدود
وينطلق صوت السكوت
والغول يموت
والخوف يموت
------------------------------
----- شعر /محمد توفيق م
ليست هناك تعليقات