أنا وصديق السوء .. بقلم / حلمي قاسم

بقلم / حلمي قاسم

 

اسمع حكايتى يا جدع
وافهم معانى الألتزام
... صحصح وركز يا جدع
هاحكى وهابدأ بالكلام
وقبل ما ابدأ قصتى
اصلى على خير الأنام
طه الحبيب المصطفى
نـــور قلـوبنا بالسلام
صلى ووحـــد يا جدع
واسمع حكايتى بالتمام
***
مليون سلام يا اهل المقام
اهلا بكم اخوه كرام
اصل الحكايه....
فلاح بسيط م البيت للغيط
لا بعرف هلس ولا تنطيط
بعبد ربى اصلى واصوم
وبدعى المولى الصحه تدوم
وقبل الفجر بقوم م النوم
ويوم ورا يوم العمر بيجرى
حياتى مليانه محن وهموم
بازرع واحصد وابدر خير
وعمرى ما ابص ف يد الغير
عندى قناعه وبحمد ربــى
طيب جداً و ده سوء حظى
عشان بتاخدنى ساعات الطيبه
وتغرقنى ف بحر الخيبه
زى ما مره من المرات
كنت مروح بالغنمات
قابلنى عفيفى ابن حسين
وقالى واحشنى يا ضى العين
فينك غايب يا ابن الناس
تعالى معايا اشرب لك كاس
قولت يا عم الشرب حرام
وانت بتسهر مش بتنام
قالى يا راجل اشرب وانسى
عيش الدنيا وزى ما ترسى
جانى شيطانى معاه وغوانى
وهاتك زن ف ام ودانى
لما خلاص لهواه سلمت
وخدنى معاه صب لى شربت
واحده بواحده لما سكرت
مره ف مره خلاص ادمنت
خدتنى التوهه ورحت بلاش
لشرب الخمره انا بدفع كاش
لحد ما مره كنت مروح
ماشى بتمتم وانا بطوح
ورجلى تقيله وايدى بتشوح
شافنى الشيخ عرفات ونادانى
وقالى تعالى وشد ودانى
سألنى يا عاصى بتسكر ليه ؟!
انت نسيت الخمره دى ايه !!
مين يا واد انت غواك و سقاك
قولت عفيفى ..غضب واتعفرت
وقالى هاتفضل كده خيبان
تصاحب صايع رد ليمان؟!!
وتسهر بره البيت وياه
كانك اهبل قوى وغشيم
وعقلك طار وصبحت بهيم
تغضب ربك تشرب خمره
يا ريتها ف جوفك تقلب جمره
تولع فيك وارتاح انا منك
حس يا فقرى عيب على سنك
وقالى اوعدنى تانى ما تسكر
ولا تماشى صديق المنكر
سمعت نصيحته بكيت وندمت
وقولت يا رب خلاص حرمت
توبه ما اصاحب ابن حرام
سكرى خمرجى بتاع برشام
وهارجع تانى اصلى واصوم
وهاصحى الفجر اقوم م النوم
ازرع ارضى وابدر حبى
اركع واسجد وادعى لربى
**
وادى حكايتى وصاحب السوء
اول مره يقــــولك دوق
وبعد شويه يقولك هات
ادفع تمن الكاس بسكات
ولما تفلس يبعـــــــد عنك
كمان يدارى ويهرب منك
وتخسر نفسك وتبيع دمك
**
نصيحه وخدها لقلبك ضى
اوعى تماشى صديق الغى
اياك تسهر بره البيت
وتنسى الأهل وزرع الغيط
صاحب راجل مخلص هادى
طيب مؤمن مش بيعادى
فى وقت الشده يكون وياك
يقولك أأمر روحـــــى فداك