مد ايدك بقلم : وفاء أحمد

مد ايدك قبل ما امشى
قبل ما اغرق
قبل ما ابطل افرق

بينك و بين اى حد عندى
مد ايدك قبل ما انسى
قبل ما اقسى
قبل ما اقدر على بعدك
و تيجى تترجانى
اقولك مبقاش فى قلبى لك
اى حب لسه
مد ايدك قبل ما يقل الحنين
و يمل الشوق
و قبل ما تاخدنى
فى زحمتها السنين
مد ايدك قبل ما يسكت الكلام
قبل ما يتوه الغرام
قبل ما يتحول حبك لذكريات
او اعتبره كان
مجرد خرافات او حتى اوهام
مد ايدك قبل ما تختفى من ذاكرتى
كل ملامحك و وصفك
قبل ما انسى صوتك
قبل ما اتمنى صمتك
قبل ما يبقى عندى قربك
زى بعدك
مد ايدك قبل ما يفوت الاوان
و تيجى تضحك
و تقولى عارفك
و حتى حاسك
ان لسه جواكى حبك
لانى ساعتها هاخيب ظنك
و بكل ثقه هارد اقولك
الحب كان
لما قلبك قدر و خان
و نسيت كل شىء
و اللى قدر ينسهولى غدرك
قبل غدر الزمان