"""حكاية موت"""

بقلم / محمود وحيد
الصبح صبح
والديك بيدن
مبتداه
الله اكبر حى

على الصلاه
قاموا الولاد
فرحانين......
الضى فى
قلوبهم
براءة
والحلم فى
عيونهم
حنين........
اتوضوا لاجل
ما يركعوا
ويصلوا للمولى
ركعتين.......
بعد الصلاه
لبسوا مرايل
حلمهم
حطوا شنطهم
فوق كتافهم
مبسوطين.......
والام بتقبل
جباهم
فرحانة بيهم
والولاد بيميلوا
بيقبلوا فيها
الإيدين.........
والأب رغم الشقا
بيمد ايده
جوه جيبه
بيجمع حبة قروش
متنطورين.......
يحضن عنيهم
بابتسامة
ينسى احزان
السنين........
يميل عليهم
يقولهم
خلوا بالكوا
من نفسكم
بلاش شقاوة
كونوا ولادى
الطيبين.......
فجأه يسمعوا
صوت المنادى
يالله بسرعة
متأخرين........
على ايه متأحرين؟؟؟.....
ينزلوا من ع السلالم
جرى
ويشاوروا بايديهم
والضحكة سابقة
بخطوتين
يركبوا باص الممات
اتنين ...اتنين......
ويغنوا غنوة
حب
ما يعرفوش ايه انكتب
ولفين كدا
رايحين........
ما يعرفوش ان النهاردة
مروحين........
الموت محضر
كل الكشوف
اسم اسم
ساعة ساعة
مين قبل مين......
قاعد على السكة
الحديد
بيحضر الاكفان
والقطر من
بعيد
بيشاور يندهه
انت فين؟........
ضحك الموت
قاله
يالله قرب
دا الولاد
جاهزين........
ضم القطر الاتوبيس
والدم طا ل
الاتنين
هوووووووووس
سكت الكلام
والموت لم الورق
ومسح بعينه
دمعتين.......
ماتوا الولاد
ما فضلش منهم
غير يادوب
حبتين.......
كام قلم
على كام كراسة
وشوية مصاحف
وارباع ياسين
18/11/2012