رسالة الى أمي ..

رسالة الى أمي ..

بقلم : بهاء الدين بدوي 

-----------------------------
الأولة جوة الحشا بين الضلوع شيلتيني
والتانية في طفولتي وفي صبايا رعيتيني
والتالتة أنا محتاج له يامة ليس سيبتيني

الأولة جوة الحشا بين الضلوع شيلتيني
وكنت جنين ..
والتانية في طفولتي وفي صبايا رعيتيني
بكل حنين ..
والتالتة انا محتاج لك يامة ليس سيبتيني
وأقول يامين ..
الأولة انتي .. والتانية انتي ..
والتالتة جنة ربنا مخلوقة ليكي انتي

ياأم موسى .. ياأخت هارون ..
ياالسيدة زينب .. ياذات النطاقين
يامدد الأمومة الساري
في كل زمان ومكان
يارحمة الرحمن .. يانفحة الحنان ..

منين أجيب الكلام اللي يوفيكي
وفين أشوف الحنان اللي ملا عينيكي
حسيت مرارة اليتم والغربة بعديكي
امي يانبع حنان .. روحي في شوق ليكي
دي جنة الرحمن من تحت قدميكي
حضرة نبينا الحبيب وصانا برضاكي
وتعم بركة وخير بسر دعواكي ..

أمي يابحر الحب ضميني بايديكي
اشتقت ليكي كتير وفين الاقيكي
اشكي لمين الأنين ولمين أبوح بالنوح
وأنا اللي وقت النوى كنت اشتكي ليكي
ومنين أجيب لي حبيب ومين يضاهيكي

بكيت ياأمي كتير وبدمعي بارثيكي
لو الدموع حتفيد بحور ماتكفيكي
ومهما طال الزمان أبدا ماحنساكي
نور ابتسامتك ياغاليه .. نور محياكي
كانت ابتسامة الرضا .. شمعة خطاويكي
ياصابرة عل الأيام .. الله يجازيكي
ياما صبرتي سنين .. ولا حد حاسس بيكي
مديتي للمساكين .. بالخير أياديكي
وجمعتي شمل بيوت .. الله يحييكي
خليتي كل الناس .. حتى اللي بلا احساس
والله حبوكي ..
الله ينور ثراكي .. والجنة مثواكي ..

ياللي زرعتي في روحي .. الروح والريحان
ياللي سكنتي في قلبي .. والعقل والوجدان

أهون عليكي ياغالية .. تفوتيني للأحزان
والله بعدك ياأمي .. اضيقت الجدران ..
مين ليه يواسيني .. في غربة الأزمان
وعزايا انك ياطاهرة .. في جنة الرضوان .

------------------------------------------