** للأسف .. بشـر ** {بهاء الدين بدوي }

 

** للأسف .. بشـر **

ليه يابشر .. ؟
ليس بس شرك انتشر ..
ليه ضلمة القلب الحجر 
بتطفي نور شمس وقمر
ليه كل افعالك بقت ..
قَتَل .. سَلَب .. نَهَب.. غَدَر
ليه الفساد في البروالبحر ظهر
ليه اليتيم من قسوتك ..
قلبه إنقهـر ..
سنة نبينا المصطفى
لاضرار .. ولاضرر 
عجبي على حكم القدر .. 
لما الفقير جاع وانعصر
لما الطمع زاد وانتشر
لما الغني .. حين إغتنى 
طغى وبطر ..
لما البخيل من حرصه ع الدنيا انسعـر
لاجل القروش .. نحت الصخر
ياخد مايعطي ..
وان يوم حايعطي 
بيكون عطاه .. شوك الشجر 
وتشوف قلوب .. م الغل تغلي 
تقولشي بركان انفجر ..
حتى الحمام أبو الهديل 
اللي اشتهر ..
زعل ياعيني .. بطل يلاغي 
ماااااات .. انتحر ..
غصن الزيتون وقع إنكسر 
خلص الكلام ..
حااسكُتْ خلاص .. ومش حاأقول.
قلبي اتنحـر ..
أصل الأوالة .. بتزيد في حلقي من المَرَرْ ..
ليه يابشر .. إسمك بَشَـرْ ؟ ولا بـِشّـرْ ؟
آآآه يابشـر .. آآآه يابشـر ..
*** *** *** ***