مجلة رؤية قلم / ما كنتش كده / بقلم / اسامة فؤاد حنا.....
ما كنتيش كده
كلمات اسامة فؤاد حنا
كان قلبك مليان حنية
وبتفرحى بابسط هدية
وتبوسى ايدك وش وضهر
واشوف فى عينيك الرضا
ماكنتيش كده
كنت بتزعلى لو يوم مشفتنيش
وتقولى ازاى من غيرك اعيش
و تشوفينى تاخدينى فى احضانك
واحس معاكى بطعم الهنا
ماكنتيش كده
عمرك ما قفلتى فى وشى الخط
كانى غريق وانتى على الشط
مش عاوزة تمد يلى ايديكى
صدقينى بادعيلك دايما بالهدى
ماكنتيش كده
كنت باغلط وتسامحينى
تزعلى وترجعى تصالحينى
ومحدش قدر يفرق ما بينا
ومش مهم مين فينا اللى ابتدى
ماكنتيش كده
اتغيرتى كتير عن زمان
وكانك نسيتى نفس المكان
وكل مرة اطلب اشوفك
يكون عندك حجة لده وده
ما كنتيش كده
وكانى باشوفك اول مرة
واعاتبك تقولى انا حرة
خليتى الناس تفرح فينا
بعد ما كنا بنكيد العدا
ماكنتيش كده
امتى هترجعى زى ما كنتى
عمرك انتى عليه ما هنتى
ونعيش مع بعض زى ماكنا
زى الورد العطشان للندى
ما كنتيش كده
ليست هناك تعليقات