(( حديث مع القلم )) للشاعر ~~~~~ رضا ابو الغيط
حديث مع القلم
****************
سن القلم موجوع
وف عينه ساكنه دموع
الآه بتولد آه
والكلمه صابها الجوع
طريق ماليه الشوك
والخوف علي الجانبين
لمين نقول مبروك
ولمين دموع العين
يا قلمي ليه الخوف
والصرخه جوه الجوف
من امتي كان الشوك
يمنع.... هوي الملهوف
حكم الزمان هيكون
مهما نكون.. وتكون
علي ايه نخاف م الخوف
ونغير المضمون؟!!!!!!!!!
يا قلمنا يا منصاب
م الأهل والأحباب
بكره الكلام تلقاه
ساكن ف قلب كتاب
يا قلمنا يا مقهور
اكتب وما تخبيش
بكره تشوف النور
بكره الكلام هيعيش
اكتب كلام نقراه
كلام يكون معناه
مهما يطول الليل
بكره النهار نلقاه
**********************
رضا ابو الغيط
ليست هناك تعليقات