بقلم منير خاطر وهكذا.......وهكذا
وهكذا.......وهكذا
متقلش ليه بس وإذا
أيام عمرنا عماله بتفوت
يوم فرح ويومين عزا
اللى اتولد واللى مات
واللى بيغنى الآهات
واللى واخد يومين جزا
ناس فرحانه وناس زعلانه
وناس لاده ولاده وزهقانه
وناس مدايقه ومتنرفزا
الصبح بتركب الاتوبيس
والزحمه فيها ناس بتهيص
تركب وتقول.....واحبذا
تروح الشغل تلاقى مدير
ماسك الساعه كأنو غفير
بوزو شبرين.... إلا إذا
ترجع وتلاقى المدام
طلباتها كتير اوى يا حرام
ويوماتى هاتلنا كذا وكذا
وفلوس تخلص يوم عشرين
ونشكك فى العشره الباقيين
ع النوته ع السطر وفى الحزا
وولاد مش داريه ولا حاسه
يقولولك اشمعنا الناس لابسه
عيال غاويه فقر وعنطزا
أيام يا صاحبى وبتعدى
فيها ساعات مندى ومندى
واهى ماشيه معانا متعكزا
ليست هناك تعليقات