(حمد الله ع السلامه ) بقلم رضا ابو الغيط
(حمد الله ع السلامه)
يا حِته مننا
وحشانا والله ياما
يا بنت أُمنا
يا روح الروح ياروحى
إنتى بلسم جروحى
و كل عُمرنا
(حمد الله ع السلامه)
يا حته مننا
علشان خاطرك يا غاليه
ضحينا بدمنا
ورفعنا الرايه عاليه
على كل أرضنا
وعشان خاطر عيونك
حالفين دايما نصونك
ومكانك قلبنا
(حمد الله ع السلامه)
يا حته مننا
علشان خاطرك يا سينا
دعينا ربنا
وأهو جاب النصر لينا
ولمصر أُمنا
وف قلبى الفرحه طارحه
كام توب أبيض وطرحه
لناسنا وأهلنا
(حمد الله ع السلامه)
يا حته مننا
بالصبر اللى مالينا
وإرادة شعبنا
رجعنا تانى سينا
والناصر ربنا
وأهى طابا بتنادينا
نعمل أعياد لسينا
ونفرح شعبنا
(حمد الله ع السلامه )
يا حته مننا
ليست هناك تعليقات