كلمات من القلب اهديها الى روح امى بقلـــــــم/ جبريل رضوان
كلمات من القلب اهديها
الى روح امى احب الناس
الى قلبى
ااااااااااااااااا
كانت امى تصحينى
من النجمه ببسمتها
تصحينى بحنيه
وبتطبطب برقتها
ولا كشرت مره
انا منسيتش ضحكتها
واتحايل تبات عندى
ولا ترضى تسيب بيتها
تصلى فجرها حاضر
وانا مبهور بتقوتها
ولما كنت باشوفها اقوم
ف الحال ابوس ايدها
تلململى ف تموينها
وسكرها مع زيتها
واستغرب تقوللى يابنى
مستوره واتعجب لحجتها
دى نبع حنان من الجنه
تلاقى النور ف سكتها
دى ربتنا بكل حنان
ولا فيش حاجه هديتها
ولا جابت ف سيرة حد
يانورها ياعطر سيرتها
اااااااااااااااا
دى اودتك لسه مقفوله
وفيها كل حاجاتك
ومسبحتك ومصليتك
عليها ختم صلاوتك
ولما بافتح الاوده وادخلها
كانى باحس همساتك
وتنزل من عيونى دمعه
تفكرنى باهاتك
تفكرنى بوجعك وانتى
تعبانه وياما خبيتى علاتك
تفكرنى بحب زمان ولما
اجى اقضى معاكى اوقاتك
وكنتى بتحزنى يامه
ف يوم الفرض لو فاتك
اااااااااااااااااا
وكان همك تراضى الناس
وكنتى بتكرى ذاتك
باخش الاودة مع نفسى
وابوس واحضن ف حاجاتك
وبادعيلك انا بالرحمة يامى
انا منسيتش دعواتك
اااااااااااااااا
انا مهما قلت يامى
كلامى عمره مايكفي
ولا حاقدر اسد الدين
ولا حاقدر انا اوفى
وحاكتب ع الحيطان اسماك
وحاكتبها على كفى
وحادعى بالدموع يامه
عشان ف الجنة تتزفى
اااااااااااااااا
ليست هناك تعليقات