بقلم عبد الله الهوارى ما تفتكريش
ما تفتكريش
ان ف بعدك
الحياة قفلت بالضبة والمفتاح
انا طالق جناح وريش
وباطير زى عصفور عاجبه البراح
بازقزق شعر وباغنى
اما احس الفرح.. بادندنه نغم فرحان
اما ف الحزن.. بالونه الوان
ما انا واخد ع الاحزان
الحزن ده بلادى
عارف كل شعابها ودروبها
ومن زمان قوى مصاحبها
زى ما حبانى انا حا ببها
وعايش عادى
اشيتها معدن العيشة
وباروح القهوة كلعادة
باشرب قهوة
سكرها زيادة
وبادخن الشيشة
وباسمع حليم وميادة
وبالليل باقضيه موال طويل
حسب الظروف
حسب الحو العام لليوم
ساعات يكون فيه خوف
وساعات مفيش
واما يجينى الملل باضيعه ف النوم
ما تفتكريش
عشان لبست توب السكوت
يبقى من فراقك هاموت
سمعتى عن حد مات م الفراق
ولا من لوعة الاشتياق
كم عاشق عشق الوهوم
لكن فاق
وعايش حياته من جديد وعشق وجدد
وشفى من وهم الماضى
وبطل يشرب مسكنات وحبوب
ورمى اقراص الذكريات
انا من دول
خلاصة القول
انا عايش ما متش ياحبيبتى
الهم والباقى عليكى انتى
انتى ف عداد الاموات
وعايشة ف الحياة يدوب ......كمالة عدد
_______________
كمالة عدد
عبد الله الهوارى
ليست هناك تعليقات