عبد الله الهوارى حروف الشوق
كتر الزحام ف شوارعك
بيعطل خطوتى
ما بتعديش يمك
وشوقى الغويط غاصبنى اروح واجى
حبال الصبر بتبوش فى انتظار طيفك
ينزل نسيرها فرافيت ع الارض
تبعترها رياح صدك
ساعت ما الشوق بيدوس على قلبى بالاخر
باجيب اخر
باكتب حروف واغزلها قصايد
واقعين بالطول والعرض
ف عرض قلب قلبك الواعر
والتوهة
بتفرض نفسها غصب
تتوه الفكرة والمعنى يتوه
ويمشوا ف سكة متكحلة ضلمة
مش شايفينلها اخر
وانا ف الشوق تايه
باصبر روحى بس مش قادر
على راس طريق فراقك
كتبت ميت موال
موال يجر موال وراه
ويزق اللى قبله ويقوله اتاجر
يصرخ يقول اه
ولا حد سامع ولا حد فاكر
يرجع لحضنى تانى ويترمى فيه
يطرح وجع
يغزل توب النوح
ويدارى ويتكلفت فيه
ويبات ف حضنى الكئيب يئن
يضطر قلبى يبوح
واحدة واحدة يبتدى يحن
ويقوله ع السر
وسرك مدفون ف فضا روحى بس باين
بيرفرف زى الطير
مهما يعلا فوق ف السما
الناس شايفاه طير انما
عارفينه زين طيب ....انه شعر
______________
عبد الله الهوارى
ليست هناك تعليقات