(( لحظة ميلاد الفرج )) للشاعر ~~~~~~ رضا ابو الغيط
لحظة ميلاد الفرج
كلمات / رضا أبو الغيط
***********************
وف ليلة سهرت لنص الليل
والعقل ملان م الخوف تفكير
من صبح ها ييجى وابقى ذليل
من دين ف رقبتى... بس كبير
وأصبر نفسى بحبة شاى
على منقد ناره كات بتزيد
لو تسمع انى الصبح ده جاى
والدين ها يحط ف ايدى حديد
وعقارب ساعتى ف ايدى شيطان
من ساعه لساعه بتجرى أوام
لا أنا لاقى ف ليلى اى أمان
ولا عينى ف ليلى عارفه تنام
واشرب ف الشاى من بعد الشاى
واحاول انسى الصبح الجاى
وافتح ف اذاعه للقرآن
وساعات أقلب على غنوه بناى
والحزن ملالى القلب هموم
عريان مستور ويادوب بهدوم
وألف الدار.... وتزيد النار
مش لاقى حلول والبال مغموم
لا أنا قادر أصحى ف الأولاد
ولا جايلى نفس.. لطعم الزاد
بردان م الخوف وشواشى ظروف
كرباجها تقيل ....كِيف الجلاد
أنا قلت أتوضا أصلى الفجر
وأقرا آيتين من سورة الحشر
الصبح أهو جاى ها نروح على فين
غير سجن بطعم مرار القبر
ورفعت ايديا لرب الكون
يفتح أبواب السما بالخير
ويفك الزنقه عن مسجون
ف أقفاص الفقر ..كيف الطير
من تعب الليل كان زارنى نعاس
ورا باب مردود من غير ترباس
وسمعت الدق ..قام قلبى انا دق
حسيت بالفاس وقعت ف الراس
وجريت ع الباب من خوفى ياناس
تشمت ف عيالى عيون الناس
لا انا شايف باب الدار راح فيين
ولا لاقى أحط ف رجلى مداس
ولقيت الشمس دى بعد سنين
جايه وف ايدها ناس غاليين
ولدى المتغرب لجل العيش
جاى ومعاه ...م المال ملايين
ولقيتنى با اصحى ام غريب
علشان م تشوف كده نن العين
فقالتلى المولى فرجه قريب
بس ...لو صبروا البنى أدمين
ليست هناك تعليقات