خايف = بقلمي / محمود مسعود (شعر عامي ) تحياتي جدو عبدو
خايف
ــ
ــــــــــــ
خايف كلمة محشورة
في قلب الكون
كلمة بقولها لما بكون
قاعد وحدي وسط سكون
وسط أهات الوجع المسكون
جوه ضلوع محشورة
في صدر أنين
وعيون تايهة من الضالين
راكبين موجة وجع وأنين
مش عارفين
إن الوجع المكبوت
وسط الملكوت
والناس ضايعين
راح يتشتت
راح يتفتت
راح يقلب كل الموازيين
راح تتبخر كل الأحلام
وحنبقي في الكون واقفين
مش عارفين
مين الضايع
مين البايع
مين إللي اختار كلمة أمين
ومين في الزحمة كان مظلوم
مين ؟ ومين؟ ومين؟
سؤال بقي متكرر
بقي زي عجين مخلوط بالطين
وحنفضل مش عارفين
راكبين قطر الزحمة المشئوم
قطر العتمة المكتوم
الماشي بقاله سنين
فوق قضبان الكراهية
وإللي حيدهس في طريقة
كل أحلام المساكين
راح يتبخر نور الشمس
وحتسكن أجسامنا الشياطين
شياطين الإنس الملعونة
اللي لايقدر يطفي شرورها
غير بس المؤمنين
بعدالة رب العزة
القادر فوق كل القادرين
ــ
ـــــــــــــــــــــــــــــــــــــــــــــــ
بقلمي / محمود مسعود (شعر عامي ) 12/2/2016م
ليست هناك تعليقات