مفيش حاجه تانيه ,, بقلم الشاعر منير خاطر

مفيش حاجه تانيه
غير إنى أكون إنسان
فى دنيا ملهاش هويه
أعقل ما فيها جنان
ناس ناطقه بالعربية
راكب عليها الجان
عقول ما تعرف غبيه
وللا مش فهمان
بلاد جميله وغنيه
راحت فى خبر كان
وهربانين م المدفعيه
اكترهم يموت غرقان
ونفوس كانت نقيه
وبتعبد الرحمن
سال دمها فى الميه
فى صراع مبين أديان
ومذاهب وعصبية
وفتنة بدات زمان
ومنابر وحسينيه
بتشحن الشبان
صعبان عليهم شويه
يعيشوا البشر فى امان
وطيارات غربيه
بتساعد على حسن حسان
بتمحى حضاره اسلاميه
بتهد بلاد العربان
مناظر اثرت فيه
وكرهت اكون إنسان

منير خاطر