(( قد القول )) للشاعر ~~~~~ رضا ابو الغيط
قد القول
كلمات / رضا أبو الغيط
********************
خايف م الضلمه وعمايلها
بتلطش... ف اللى مقابلها
لا هى حاسه باللى بيعشقها
ولا شايفه... اللى مزعلها
راح أقيد كشافى اللى ف ايدى
م الفرح ...الساكن ف وريدى
واتغصب ....ع الضلمه تنور
وأدور ... على نفسى وعيدى
و اتمشى ف دهليزى العاشق
لخطاوى.... ولصوت قباقيبى
وان سهم العتمه كان راشق
لا ها سلم ...ولا أقول ده نصيبى
وها اكمل لازم مشوارى
واتحدى الضلمه اللى ف دارى
وافتح شبابيكى المقفوله
للشمس... تولد لى نهارى
واتشعلق ف جناحها لفوق
وأشيل.... م الرقبه الطوق
واغرف من نورها واغنى لها
وأبدرها للخلق تفوق
وأمسك ف سحابه معديه
وأعزمها تنزل ف بلدنا
وتجيبلى وياها هديه
تروينى ...وترعرع زادنا
ف ميعادنا الصيف الجاى
ف السهره عند الطبليه
مش حاطت ع المنقد شاى
إلا وإن كانت ...ويانا بهيه
فارده على كتافنا ضفايرها
وخدودها جميله ورديه
ولا حدش يقدر يعايرها
بأولادها ..وأجيالها الجايه
جيبالنا ف مشنه رغيف
من قمح طارح ونظيف
ف غيطانا اللى ما بارت منا
ولاصابها عُنف وتجريف
فرحانه بطرح المحصول
شيفانا مع أصل الفول
وف إيدنا القطن بيترقص
على وتر النول
بعديها ها نصب الشاى
للطارح م الجيل الجاى
ونحًكى على صوت الناى
رجاله.. وكانوا قد القول
رضا ابو الغيط
ليست هناك تعليقات