بقلم / على عمر ... واخرتها انا ام
أخرتها يا ولدى لكلاب السكك بترمينى
وتسيب البرد ينهش لحمى وأنا اللى دفيتك بضلوعى
ويوماتى دمع عينيا يحن عليا ويغطينى
كـَليت منى خلاص يا ولدى ؟
طب أنا عُمرى مرة بيك كـَليت ؟
مـليت خلاص من كلمة أُمى ؟
دى خسارة بلسانك تقولها
عارف ليه ؟ عشان كلمة أُمى
كلمة أطهر وأشرف من إنك تنولها
رَمتنى لجل مراتك ترضيها ؟
وتضحك لك ضحكة الشياطين
بُكرا تهون وترميك نفس الرمية
فِعلك صعب إنى فِعلة خسيس
لإنها فِعلة يستحى مِنها الأباليس
أنا تِحوجنى للى يسوىَ واللى ما يسوىَ؟
واستنىَ اللى يعطف عليا بهِدمة ولا لُقمة
نسيت لما كُنت ألاقيك جعان
باشبع لما أخرجلك من فمى اللُقمة
ده أنت مرضعتش منى غير الحنان
بخاف أغمض عينيا فى عيون الليل
ومنين هيجينى نوم وانا فى الخـَلاَ
يا مرار أيامه اللى بولده إبتلىَ
أنا نفسى أوصفك " بالكلب "
بس إزاى هيجينى قلب
وهو لما بينزاح عنى الغطا
ألاقيه بيشده عليا ويغطينى!
ليل ونهار بادعى عليك بالشر
من شِدة القهر بالحهر أو فى السِر
والاقى قلبى يرد , بس إسكُتِ إسكُتِ
متدعيش عليه . ربنا يبعد عنهُ الشر ...
بقلم / على عمر
ليست هناك تعليقات