الصورة ازاز .. بقلم الشاعر محمدعمران‬

الصورة ازاز
جوة البرواز
مشروخ مكسور
انسان معزور
بيبص ويضحك ف الصورة
هياها الضحكة المكسورة
من واحد شاف كل الدنيا
بتدور ف دواير مقفولة
وعنيه باصين
ع الجنب يمين
بنوتة بتضحك بصاله
بيقولو انها ام عياله
ايامها كت لسه خطيبته
حباه ف حضوره وف غيبته
تفرح جدا لو جت سيرته
الصورة هزار
مليان اسرار
كمية كبيرة من الافكار
وعيون زعلانه تطق شرار
الصورة دموع
احساس ممنوع
انك تفرح
طيب نشرح
انسان من كترة اوجاعه
اتمنى الموت مليون مرة
مكسور من جوة ومن برة
وموزع نفسة ف 100 سلة
ع 100 مشوار
يسهر بالليل
وينام ف نهار
ده اخينا حمار
اتعود يسكت للدنيا
ويقول معلهش وعديها
وان مرة تكشر ايامك
اهرب منها ياواد قضيها
هتعيش فيها وهتموت فيها

انسان عمره خلاص بيعدى
عامه الخمسين
انسان مسكين
كان عاش انسان
دلوقتى اهه واحد م المجانين

‫#‏محمدعمران‬