بورما بتنادى، بقلم / أمل السيد

ياأمة الإسلام

فيك أنا حيران

فيك الحكمة والقوة

فيك الضعف والكتمان

فيك قلوب طاهرة

فيها الصبر والإيمان

يا حرة ليه راضية

بظلمهم لينا وهدمهم لإديان

وليه فى أراضينا

ساكتين على سيوفهم

ما بنعلن العصيان

ليه القلوب عمية

مغمضة ونايمة مسلمة لطغيان

وليه على جثثنا وأهلنا وناسنا

ماشين كما العميان

هان الكبير فينا بحكم أعادينا

وقتلوا الولدان

غمو لنا عنينا وأيدو ايدينا

وقطعوا فينا بسكينة شيطان

قالوا علينا إرهاب وحرقوا الاعتاب وهما بقو رهبان

سقو البحور بدمانا

روا بيها الوديان

ولما جينا نروح نهرب بقى بالروح

صدونا وباعونا وتانى رجعونا

قالو ما ليكو مكان

راجعين تانى للنار ما لينا منها فرار

غير أول الجيران

والله كمان جدعان طبعا مهم اخوان

يأمة الإسلام

هحكى أنا حكاية إسمعهوها يا أعيان

كان فى أمل طارح

فى عيون صبي فالح

فارع طوله عفى

من قلبه فر الخوف

صرخ بعلو الصوت

تعالوا ياعمامى نقف لهم ونشوف

نادى وقال

يا ضيوف ما تسكتو تانى

لتموتو يوم م الخوف

وقف الصبى يارجال

نادى بصوته العال

يا مسلمين ليه

ليه الإيمان فيكم بقى كده ضعفان

ليه الحقوق ضاعت ما بين أوى وغلبان

ليه النفوس هانت بقت ولا الخرفان

والأم اهى بتصرخ والأب بقى بكيان

ليه الصغار جاعت

ليه الكبار باعت قضية الإنسان

حرمونا فرحتنا

سلبونا جنتنا

قادو نار الأحزان

ليه الأمل مفقود

والعمر مش مولود

وليه مات الاحسان

بقت جثثنا وقود لنار ما ليها حدود

ولما خافوا النار تاخد لنا بالتار

طفوها بدمانا وانتم علينا شهود

يا مسلمين ليه؟

ما عاد فيكو بيشوف ضرير ولا شواف

ليه ارتضيتو نموت والكل بقى خواف

ليه ارتضيتو تكون ارض بلادى قبور

ليه ارتضيتو نكون شباب مهان مقهور

داحنا فى ارض الله

قلبى هرب م الخوف

مين فيكو يجى يشوف

رايح لهم وحدى

كاتب الهى الله على إيدين وكفوف

وهو رافع كفه كاتب عليه الله

وقع صريع مقتول

كده فى غمضة عين

قالوا يكون عبرة

لكل رافع يمين

وقطعوه نصين

صاحت قلوبنا تبكى

يا صوتنا رحت فين

وعلقو الصبى من رجليه

على الجمبين

كل ما رحت وجيت

من جمبه أو عديت

اسمع لسانه يقول

عملتو إيه يا أسود ؟

ياأمة عايزة تسود

يا جنة الموعود

والله ما ليكى وجود

إبكى ياإسلامى

يمكن تاخد تارى

ابكى على روحى

لحمى اتشوى صاحى

إبكى بعلو الصوت

دا طفلى مات موقود

ما انقذه نوحى

إبكى على أمى

سال دمها ودمى

على جثث خالى وعمى وعيالى

إبكى على شعبى اللى إبادو وحوش

يالله يا مسلم قوم

كل اللى باقى يوم

وبعده ما فيه قوم

طهر سماك إلحق

قبل الغيوم ما تدوم

يالله يا مسلم قوم

قوم إنصف المظلوم

قوم إطعم المحروم

نور له ليل معتوم

يالله يا مسلم قوم ما عاد يفيدك نوم

دا أعدائك صاحين ما بيسمعوا للوم

مد إيدك لاخواتك دا قلبهم موجوع

انهض وقول الحق

دا الحق صوت مسموع

والأجر عند الرب يوم اللقا مدفوع

يومها تقوله يارب جايلك راسى مرفوع