يانبض القلب ، بقلم / محمد الساعي

مابين الدقه والدقه

باحس بحاجه وخداني

بتهمس ليا في رقه

تغيَّر كل وجداني

مابين أيوا وبين لأه

اتوه في الحيره من تاني

وارجع ليكي اقول حَقْه

غرامك من زمان جاني

****

يانبض القلب جوايا

مشاعر ليكي مالها حدود

يا أم الضحكه ضلاَّيه

وشعرك ع الكتاف مفرود

بحبك ياللي علشانك

أعدي بحور واهد سدود

وطول مانتي ف حياتي ربيع

أكيد عمر الخريف ما يعود

*****

وبارجع من بعيد مشتاق

لحضن عنيكي والاقيكي

بتشكي الشوق وبالأشواق

وحاضنه الدنيا بإديكي

كفايه بعاد .. كفايه فراق

وقلبي بلهفه يناديكي

يغير من حبنا العُشَّاق

وباهرب م الحسود ليكي

يا حب العمر مش لاقي

كلام يقدر يوَفْيكي