حبك بقلم محمد محمد الساعي

صدقيني

انتي عندي نبض قلبي

ونن عيني

كل عمري اللي ابتدا

من يوم ماشفتك

دنيتي وفرحة سنيني

صدقيني

امتى هاتحسي بأمان؟

امتى هاتدوقي الحنان؟

لو حاولتي تهجريني

مانتي جربتي البعاد

قولي ايه اخر العناد

مهما لفيتي البلاد

مش هاتلقي في يوم حنيني

صدقيني

مش بازوَّق في الكلام

مش باغني والسلام

دانتي نبع الحب كله

زهرة البستان وفله

نفسي اشوف قلبك واقوله

م البعاد انا زاد انيني

صدقيني

روحي مابتعشقش غيرك

عشت باتنفس عبيرك

والحنان منك راويني

قلبي داب م الاشتياق

جوا منُّه الف داء

يبقى ليه بس الفراق

لو عرفتي هاتعذريني

صدقيني

دانتي كل نبضه فيا

ضحكتي وفرحة عنيا

عمري ما خدعتك بحبي

طول حياتك جوا قلبي

نفسي اعرف بس ذنبي

لو عرفت ... تريحيني

صدقيني