الحلم ، بقلم / محمد الساعي‏

حلمي قصاد عيني

لكن مابينا سدود

اندهله هايجيني؟

ولا الطريق مسدود

مع انه كان جنبي

ومافيش ما بينا حدود

ساكن هنا ف قلبي

بين الضلوع موجود

لكن بعد عني

وبألف باب موصود

وفراقه واجعني

وجع مالهش حدود

ياحلمي يا ضايع

معقول مالكش وجود؟

وم الخيال نابع

وم العيون مرفوض

مع انه حلم بسييييييط

ابسط من المفروض

لكن طريقه طووويل

وبالحسك مفرود

تعبت م الانتظار

مستني يوم ما تعود

وتزهَّر النوَّار

ونفهم المقصود

****

يا حلمي يا موجوع

بكره الأمل ها يسود

مافيش مكان لدموع

لكن زهور وورود

طول ما تكالنا عليك

يا ربنا المعبود

الحلم يتحقق

طول ما الأمل موجووود