يا فرعون متخنئنيش ، بقلم / مجدي سالم

يا فرعون متخنئنيش

خنئتك بتزودني عناد

تحبس قيادات

تقفل قنوات

ميهمنيش

مصري وقادر

أحقق طموحي

وابعد كل خاين

وارسم بصدري

صورة شهيد

********

يا فرعون متخنئنيش

متصحيش المارد

اللي قادر يحقق حلمي على مر السنين

اكون انسان

اكون واحد م اللي شرب مية النيل

واتيمم بترابها

وغزل من ضوء الشمس فساتين

تحكي عن جمالها

تفضح اللي خانها

اللي قتل شبابها في الميادين

خرطوش وسنج

وبلطجيه محميين

من اللي خان البلد

وباع الولد

وراح يقبض التمن

غاز وسولار وبنزين

**************

يا فرعون متخنئنيش

خنئتك بتزودني عناد

غرتك النجوم والنسور والأيقونات

الكتف مال من تقلهم

افتكرت إنهم بيرفعوك لأعلى المقامات

قارون خدته ليك قدوه

خسف بيه الأرض رب العباد

وفرعون لما قال أنا ربكم الأعلى

في اليم كان جزاؤه

ونجا الله موسى واللي معاه

متفتكرش ان الشعب ليك هيتحني

زمن العبوديه ولى ومات

إذا الشعب يوما أراد

فلابد أن يتنحى مغتصب السلطات

الديمقراطيه في كل البلاد مزهزه

وعندنا دفنوها تحت البيادات

قوم يا مصري وعلي صوتك

معدشي لينا سكات

علي اللي خان الوطن

وباع الولد

وراح يقبض التمن

غاز وسولار ودولارات