دعوة حب .......... بقلم محمود وحيد

بلاش نهرب من الواقع

ونتدارى ورا أوهام

ونلعب بالكلام والقول

نبدل حلنا بحــرام

بلاش النفس تخدعنا

تضيعـــــــنا

تشمت فينا أعداءنا

وتحرمنا نعيش فى سلام

بلاش نحسبها

بالمقلوب

ما بين غالب

وبين مغلوب

وببقى حلمنا ضيق

نشوف ضى الأمانى ظلام

===============

بلاش نخدع مقاصدنا

نحرف أصل نوايــــانا

شيطان الغدر يبعدنــا

ما نصدق حتى ويانــــا

نغرب فينا بسمتنا

وتهرب منا سكتنا

نشتت بالخلاف لمـة

يعيش الهم جوانـــــــا

بلاش تخوين على الفاضى 

وع المليان

ونتهم بعض ونشعلها نيران

فى نيران

يا خلق يا هو تعالوا نحب 

بعضينا كفايانــــــــا

==================

تراب الارض مش ناقص

بحار للدم

وتوب الحرة مش قابل

خيوط للهم

عيون الخسة شايفانا

فى كل خطانا راصدنا

بتبدر سمها رياحين

وفى الاخـــــــر

بنجنى غم

تعالوا نوحد الكلمة

على حب الوطن ونفوق

نداوى الجرح بإيدينا

نعليها ونعلى لفوق

فى حضن السمرة نتجمع

وليها نضم