قبل الوداع ، بقلم / منى فتحى

مش باقى ع الوداع

 غير بس خطوتين

و نسابق الشراع 

ونروح ف سكتين

تايهين وأحنا ف مكانَا

بنسأل عن زمانَا

وتتقابل عيونَا

ويسرقنا الحنين

مش باقى ع الوداع

 غير بس خطوتين

الفجر علينا فات

والحب ميعادة بكره

عدانا من سكات

وخدتنا ألف فكرة

أحلامنا ف المدي

عطشانا للندي

والشوق اللي أبتدي

رفرف ف دمعتين

مش باقى ع الوداع 

غير بس خطوتين

ماشين ع الارض نحلم

والعمر بيتسرق

والشوق جوانا شمعة

تحرقنا وتتحرق

نضحك والضحكة سر 

من أسرار الحنين

مش باقى ع الوداع

 غير بس خطوتين