خايفة ..بقلم : هناء نوار

خايفة ..
أيوة خايفة ..
خايفة منى على نفسي ..
مش خايفة منه أو عليه .. 
كل ما اقول خلاص نسيته ..
ارجع تاني افكر فيه 
لحد إمتى حفضل 
أسيرة حبي ليه ..
لحد إمتى حفضل
أسرح و أفكر فيه ..
حكايتنا خلصت من زمان ..
و ماعادش ليّا جواه مكان ..
خلاص مفيش ما بيّنا أمان
مجرد حكاية 
بطلها الحبيب ..
بعيد عن عيونى
ف ِقلبى قريب ..
تاهت أسامى 
ما بين الأسامى
و اسمه فِ حضنى .. 
الأنانى الغريب
بجرب أقرب .. 
فببعد بعيد
يجرب يقرب .. 
يجينى ك عيد
أدوب لما احسه .. 
و حلمى يمسه
أفوق جوة منى ..
بكابوسى العنيد
و انام تانى و احلم ..
و اشوفه معاية ..
و نمشي فِ سكة
و ملهاش نهاية ..
نسافر بلاد 
نشوف العجايب ..
و نرجع نولّد شوقنا اللى غايب
نسهر سوا فِ ليلنا الطويل
و الكون بيعزف لحن جميل 
نلقى القمر فارق مكانه ..
نشوفه قاعد جمبنا ..
زى ما يكون طيف ملاك ..
وجاى يبارك حبنا .
لكن يا خسارة .. 
و ميت خسارة ..
كله وهم أنا عايشة فيه 
خايفة أصارح نفسي بيه ..
خايفة قلبي اللى حَبُه يوم ..
يِقسي عليّا و يصبح ناسيه !!