ما تنسنيش .... بقلم / شوقية كامل

بقلم / شوقية كامل

 

ماتتنسيش
**********
على قد ما قلبك شال
من هم الدنيا اهات
وتمرمغ توبك ذل
... ولجموكى سنين سكات
لسه فيكى روح عفيه
وايد قويه
تضربى الخوف بدرعاتك
لسه شابة مستحيه
تعشقك كل العيون
والكون بيرسم ضحكتك
فى عيون ايزيس
والنيل يلملم دمعتك
والليل ونيس
ماتتنسيش
فى لمة العيد الكبير
وحكاوى جدة تملا قلبك بالدعا
تلفلفك فى شال حرير
مرشوش دفا
فى نسمه بتعدى على قلبك يطيب
وزقزقة عصفور بيتعلم يطير
ماتتنسيش
ياعروسة طالعة محنيه كفوفك هنا
وبتغزلى من فرحة احلامك غنا
زغروده مبدوره على السكك
قطرات ندى
غالى الضنا
واغلى من نور العيون
لو شعره من راسه تضيع
يتهز قلبك غضب
ويصبح نسيم روحك جنون
يا معدية كل المحن
صبر السنين
مزروع على توبك شجن
ماتتنسيش
دانتى باقية والزمن
بيعبى من حبك حكاوى
ويشهد على سنين انتصار
فامتسمحيش للغدر يمحى غنوتك
واحلام صباكى
هاتعيشى لينا للمدى
و للمدى روحنا فداكى
جايز ف يوم
ترجعى احسن ما كنتى
وف سكتك
تفرش غناوى