ليه بتقولي الوداع ... بقلم / محمد الشرقاوي

بقلم / محمد الشرقاوي

 

ليه بتقولي الوداع
ولسه بينا كلام كثير
بينا كلام وآهات وبينا
عتاب وملام
بينا علي البعد رغم عنا
... ذكري عايشة وسلام
بينا حكاوي في ليالي باردة
مخلصنهاش
كنا بندفيها بكلامنا
ودفء الكلام ماانتهاش
ليه بتقولي الوداع
ولسه ايدك حاضنة ايدي
ونظرة الامل بتترجي في عنيكي
بلاش تصدق ---
بلاش تقبل الوداع وترحل --
اللي بينا لسه باقي
باقي عمر ماضاع --
وبينا احلام ماتخلص
ليه بتقولي الوداع
ونابضك حاسه بيرتجف
وقلبك شايفه بيرتعد
وغمزتك غصب عنك
واصطناعك لضحكتك
بتقولي الوداع
وانتي علي نفسك بتكذبي
وان صدقتك انا
مش ممكن الأنا حتصدقك
ليه بتقولي الوداع
وموج البحر بيضمنا
وقمر سهران بيبكي
هو نفسه القمر اللي
شهد اول ليالي حبنا
ليه بتقولي الوداع
وفيه طفل صغير علي ذراع امه
بيضحك لنا
وفيه عيون سهرانة فرحانة
مصهللة
وكمان عيون حاسدين
بتتربص بنا
ليه بتقولي الوداع
ياقلبي وروحي وعقلي
ياايامي وسنيني
ياضحكتي وجرحي وكل عمري
ليه بتقولي الوداع
وفين عهدنا علي
اللي باقي من عمرنا
علي الوفاء وقبر واحد
بعد الموت يضمنا
ليه بتقولي الوداع
وانتي حاسة بيا
وحاسس بيكي
لسه دمي بيجري في وريدك
ودمك بيجري في وريدي
لسه بنقسم الضحكة بينا
والاحزان بنكتمها
علشان لا آلمك ولا تآلميني
ليه بتقولي الوداع
وانتي حتة مني
ليه عاوزة الجمال يبقي ذكري
ليه عاوزة كل شئ يموت النهاردة
ولا يبقي شئ لبكرة
ليه بتقولي الوداع
وانا حاضنك جوة عيوني
وبجفوني مغطيكي
وانا لسه باحميكي
لسه باضحي بنفسي وافديكي
ليه بتقولي الوداع