لا مش هسلم ... بقلم / محمود وحيد
بقلم / محمود وحيد
رسمت الضحكة بسمايـــــــــــة
وجوة العين باحايلها
وادارى بيها دمعايـــــــــــــــــة
... بقالى سنين وشايلها
اداديها
واحاول انى
ارضيها
واشاغلها بكام غنــــوة
وحدوتة مع حكايــــــــــــــــــة
يا بوى على قلبى ودماغة
ما هوش راضى يتبعنى
احاول فيه يكون جنبـــــى
ولو بالكدب يسمعنى
اجرجر فيه
واحايل فيه
لكنه يسيبنى بدموعى
ما يرضى يبقى ويايــــــــــــا
طب اعمل ايه
ما دامت دنيتى جارحة
ورافضانى
وحالفة عليا وع الفرحة
وساجنانى باحزانى
اصالحها تخاصمنى
ولو اضحك تحاسبنى
انادى عليها تبعدنى
وتجرح فيا شكوايـــــــــــــــا
اسلم يعنى لدموعـــــــــى
وارفع للهموم رايتى
واحضن فيا موجوعـــــى
واكمل حزنى بحكايتى
اعادى البسمة وانساها
ولو تهوانى ما اهواها
وافرح دنيتى بعجزى
واشيب عمرى جوايـــــــــــا
لا يا دنيا انا مكمــــــــــل
هاعافر مش هاسلمــــلك
هاعيش ع الصبر واتأمل
لاوهامك ما اكون ضلك
هاجفف دمعتى بايدى
واصحى الدم بوريدى
واخلى البسمة تملى الكون
هاحولها لضحكايـــــــــــــــة
ليست هناك تعليقات