أم شهيد .. بقلم / وفاء أحمد

بقلم / وفاء احمد

 ممكن تحكيلنا ده حصل ليه؟
و ابنك كان هناك بيعمل ايه؟
كان بس بيحلم بالتغيير
...

و علشان كده راح التحرير
كان عاوز يشوف فجر جديد
بس نصيبه
يرحعلى شهيد
كان واقف فى حاله
و بيقول "ارحل"
لكن وقع فى ايد
ناس مبتعرفش ترحم
كان عاوز انه يرجع حقه
كان عاوز يعيش بكرامه
فى بلده
لكن فيه اللى مكانش عاجبه
و بكل غدر ضربه و قتله
طيب ايه اخبار اخوه
اكيد انتى هتخافى عليه
و انتى و ابوه هتحاولوا
من الخروج من بيته تمنعوه
و من انه يكرر غلطة اللى سبقوه
و مين قالك انها غلطه
ده حلم الحرية اجمل فكره
عاش جوانا امبارح
و هيفضل عايش انهارده و بكره
و انا و غيرى اكيد هنضحى
لاجل نشوف حرية بلدى
و نرجع تانى نعيش فى امان
و انت و غيرك تحس
انك انسان
عايش حر بكل ارادته
و محدش يقدر يفرض عليه رأيه
و تحس بفخر ان دى بلدك
والخيراللى فيها ده من حقك
و تكون عارف ايه حقوقك
علشان تقدر تعمل واجبك
و ان كان على ابنى
اهو راح الجنه
و انا و غيرى
هنفضل نتمنى
ان بلدنا ترجع لينا
مش لحزب و لا لفئه بعينها
طمعانيين ياخدوا خيرها
و هما عمرهم ما ضحوا علشانها