شريــط اسـود بقلم : محمد الشرقاوي
شريــط اسـود
ودقيقة وكلمة حداد
علي سنة راحــت
سنة خايبة اتشحت بالسواد
علي شهيد اتاخد غدر
وبنت اغتـصبت
وزوجة خانت وولد عاق
شريـــط اسود
ودقيقة وكلمة حداد
علي كلمة انكتمت
واخلاق ضاعــت
وبلطجة قامــت
وعمـر فـــات
شريـــط اسود
ودقيقة وكلمة حداد
علي بقر بيحكم
بيتحكم -- بيقتل ويسرق
ويدمر في البلاد
شريـــط اسود
ودقيقة وكلمة حداد
علي كلمة تافهة
تقرف تكنسها المقشة
وتاريخ اتملا بالتفاهات
شريــــط اسود
ودقيقة وكلمة حداد
علي ارض بارت
ومباني انهارت
ومجاري فاضت
وزحمة مواصلات
شريـــط اسود
ودقيقة وكلمة حداد
وصرخة طفل مولود
من رحـــم مـــــوت
ودمعه نازل يندب حظه
في سكات
شريـــط اسود
ودقيقة وكلمة حداد
علي كل 2012
سواد واتبعه سواد
ويـــارب
تكون 2013 باللي فيها
اجمل من اللي فات
ليست هناك تعليقات