عندما يبكي الغراب ... بقلم / بهاء بدوي

بقلم / بهاء بدوي

 

لما مصر يتغير في قلبي طعمها
وبكاسها تسقيني المرار وأنا إبنها
...

لما يتغير في عيني لونها وشكلها
وأبقى زي الطير غريب عَنّها

لما أشوفها من بعيد
وأقول ياريتني ماشفتها

لما أحس بغربة ماببين أهلي
اللّي هُمّا أهلهـا ..

لما مالاقيش الأمان
اللي كنت بااحسه في حضنها

لما أدور عن صحابي بتوع زمان
والتقيهم كلُهم تايهين
حيارى في دربها ..

لما ألاقي الدين أصبح دقون
وقلوب بتغلي من غلها
ومن حقدها ..

لما اسمع رئيس بلادي
يصيح ينادي .. ياعشيرتي ياولادي
وكأننا مش منها ..

لما قابيل يقتل أخوه ويفتخر
ويقول أنا اللي عملتها ..

والغراب يبكي ينوح ويسأله
القسوة دي منين جبتها

رغم كل الحزن فيها والألم
هاأعيش وأموت باأحبها

رغم كل الإنشغال والهموم
همي هو همّهـا ..

وأدعي رب العالمين
يلطف بمصر وأهلها ..

نفسي أرجع تاني ليها
نفسي تنزاح الغيوم
عن شعبها ..

نفسي أكون نجم في سماها
وأندفن في أرضها ..