لميت قلوعي ..... بقلم الشاعر / علي فرج

بقلم / علي فرج

 

لمّيت قلوعي وقلت ارتاح على شطك
وفاكرة أمااان ،
...

ورميت شراعي ف وسط البحر مطّمّن
لشط حنان ،
وشيلت الدّفة م المركب عشان تِهَدى
مفيش دوران !،
منا عارف ماليش غيرك هيحويني
يلملمني من النسيان ،
،،،،،،،،،،،،،،،،،،،،،،،،،،،،،،،،،،
ف وسط البحر وانا جايلك ،
مكانش ف بالي غير حضنك
ومشتاقله بقالي زمان ،
وكان نفسي ادوق نيلك
واسهر تحت قناديلك
واناجي في نجوم ليلك
وابوس قمرك واضمه كمان !!
لكن حيّرني إهمالك
ومعرفتش في أيه مالك ؟
قتلتي الفرحة في قلبي
وفجّرتي الدموع بركان ،
دنا اللي كنت آمالك
وتتمنيني ابقالك
وليه فجأة اتقلب حالك
تردّيني كده وجعان ؟
،،،،،،،،،،،،،،،،،،،،،،،،،،
رجعت اغزل شراع تاني
وأفرد في القلوع تاني
وهاعمل دفة بضلوعي
ومهما أقاسي وأعاني
مفيش باقي غير الدوران
وهارجع تاني للنسيان !!!!