تخاريف .. بقلم الشاعر / محمد السيد

بقلم / محمد السيد

 

فـ الليل
بعد الحياة ما تنام
...

و الصمت يملا دنيتي
و فـ وحدتي
اصب م الذكريات
كاسات ..
اشربها ..
أنسطل ..
و تبدأ التخاريف
بضحكة حزينة
فوق شفايفي
ترسم ملامحي من جديد
ترسم على وشي العنيد
شكل مخيف
يزعج مرايتي المُعتمة
و المؤمنة
بوشي القديم
و القاني
فـ سكة واخداني
لمكان اول لقا
بيني و بين نفسي البريئة
قصدي ...
اللى كانت بريئة
و اتبدلت ف زمن الزيف
نفسي اوصل
لكن طريقي
مش بيكمل ..
و تتوه الخطوة مني
حلمي الجميل
غصب عني
ينكسر فتافيت
تنفرط عناقيد
الشوك جوايا
تمزعني ..
تصدمني ..
و افوق م الصدمة
الاقي ....
نفسي فوق رصيف
بتسول البسمة
من عيون الفرحانين
و ابيع الدمعة
للي غاوي يموت حزين
و انااااااام
حاضن وحدتي
و دمعتي ملو الكفوف
احلم ..
و فـ الحلم اشوف
ذكريات ...
ماليا الكاسات
اشربها ..
انسطل ..
و تبدأ التخاريف