ثورة قرداتي .... بقلم الشاعر / بهاء بدوي
بقلم / بهاء بدوي
قرداتي ودي شغلته
يرقّص السعادين
...
يرقّص السعادين
...
كان عنده قرد عجوز
إسمه أبو الميامين
شايل في إيده رق
وعصاية ييجي شبرين
ورقبة القرد رابطها
بحبل متين
من طلعة الفجر يسرح
يلف في الميادين
يجري عليه العيال
ويصقفوا لميمون
ويغني على طبلته
يقول ياليل ياعين
والليلي ليلي ليل
إلعب يابو الميامين
والقرد أبو الشقلباظ
طلعان عينيه الاتنين
يقول له نومة العازب
يتمرمغ على الجنبين
يطلب عجين فلاحة
يلت له في العجين
وفي يوم كرامة القرد
نأحت عليه حبتين
إكمن صاحبه بعصايته
لسعه خرزانتين
قال ورحمة ماما
ميمونة أم ديلين
حقي تالت ومتلت
وهاأخلي ليلته طين
رجعوا سوا ع البيت
وكانوا هلكانين
قال له تعالى ياصاحبي
ناكل لنا لقمتين
رمى لقرده موزاية
وهو أكل موزتين
القرد قلبه اتغاظ
كشر عن النابين
والحقد بان في عينيه
والغل يعمي العين
وقال اشمعنى هو
يلهف الموزتين
حلف طلاق من شيتا
يرد صاعه صاعين
وقال هاأوريلك
مين أبو الميامين
سهر يوميها الليل
فاتح عينيه الاتنين
لحد صاحبه مانام
وشخّر له تشخيرتين
القرد فك الحبل
وعمل له شقلبتين
وبسرعة فتح الباب
وعرف طريقه منين
رجع وجايب معاه
م القرود عشرين
اللي شايل له عصاية
واللي معاه طوبتين
ودخلوا ع القرداتي
وكتفوه بحبلين
نزلوا عليه الغيلان
بالطوب وبالعصيان
واحد يعضه في إيده
والتاني ماأعرفشي فين
وطفحوه الكوته
والكوته تيجي منين
صاحبنا قام مفزوع
يصرخ وويله ويلين
ينده ياخلق ياهووووه
غيتوه يابني آدمين
لاحد سامع نداه
ولا حد قال له انت فين
ودي آخرة الطماعين
واللي ياكل موزتين
ليست هناك تعليقات