اراجوز القلعة

اراجوز القلعة

بقلم : احمد فخري

---------------------

علي باب القلعة ...

بقلع كل ملامحي العيرة ..

واتحلل من جلدي السحت..

وادخل في دين الحراس

انا الكومبارس الصامت في هواشم العالم

وزحام القهوة وع الرصفان

باخد دور اراجوز بمهارة

وواحد دلدول من ضمن كلاب الاسياد

يربطني في ديل الساقية ويسبني ادور

الفح علي كتفي همي اليومي ...

ملو شيكارة .

واربط في السبحه روسان مخاليق

مخانيق

كل هدفهم اتعري قصادهم

عيل قرادتي ياخد دور صاحبي

يشبط علي صدري لاجل سيجارة

وتلاته تيران يقاسموني السرقة

في ميزان احساسي الحساس

انقل رجلي بين جتت الموتي المكاسيح

و اوقف علي مكنه عقلي المحتاجه تروس

ولما اتعب من دور بندول الساعة

اقعد علي باب المسرح

اغطي ضميري بورق التوت الحلواني

واشغل نفسي في كلام في الحب

لواحدة اساسا كرهاني

تكسر قلبي وترمي عقابه مع قشر البيض

اقلب عيني وادخل في سباق

في الربع الخالي

وانا بحلم اطلع من الافرول الكاره اهلي

ومش طايق جلدي

وادخل في ملامحي

علي باب القلعة .....

مع تحياتي احمد فخري