آ آ آ ه .. آ آ آ ه .. بقلم : الشاعر بهاء الدين بدوي
آ آ آ ه .. آ آ آ ه ..
بقلم : الشاعر بهاء الدين بدوي
----------------------------
الأولة آه .. والتانية آهين .. والتالتة تلاتين آه ..
الأولة آه من قليل الأصل لو يملك أراضي وطين
والتانية آهين لو اتحكم في بني آدمين
والتالتة تلاتين آه لو استغني عنك يوم
الأولة آه من قليل الأصل لو يملك أراضي وطين
هيتنمرد ويتفرعن ويخسر نفسه دنيا ودين
والتانية آهين لو اتحكم في بني آدمين
يزيد كبره وجبروته ولا الفرعون
والتالتة تلاتين آه .. لو استغنى عنك يوم
هيكون ياويلك منه .. ماله أمان
ويستندل وينسى الفضل والاحسان
الأولة الأصل غلاب ..
ومن شب على طبعٍ عليه بيشيب ..
والتانية كلها بملح أكرم لك ..
من الحوجة لعدو وحبيب ..
والتالتة خليك مع الله ..
واكرم قريب وغريب
هيكون معاك ربنا ..
وتبقى في القلوب محبوب .
واصبر وحب الحياة ..
ومصيرها يوم حتطيب
وخلي عندك أمل ..
دي مرة تخيب .. ومرتين بتصيب
رزقك ووعدك ياصاحبي ..
في السما مكتوب ..
لازماً يجيلك يجيلك .. في أوان مايغيب
على الحلوة والمرة عيش وارضى
واللي يجيبه الحبيب محبوب
وحسن الظن والنية في خلق الله مطلوب
وانصر أخوك ينصرك .. لو كنت يوم مغلوب
وخلي نفسك في نفسك ..
وانظر لعيبك وتوب ..
وسامح الناس حتى لو حدفوك بالطوب
وادعي عزيز غفار
وانصح صحاب الذنوب .
ربك كريم ورحيم .. وياما يستر عيوب
خلي اتكالك على الله ..
دا هو علام الغيوب .
ويارب صلي وسلم .. ع المصطفى المحبوب .
ليست هناك تعليقات