( دنيا السلم والتعبان ) بقلم : بهاء الدين بدوي

( دنيا السلم والتعبان )
بقلم : بهاء الدين بدوي

--------------------------
دنيا عجيبة زمن تَعْبان
زي السِلم والتِعبان ..
سلم يطلع بيه لمية
تِعبان بينزلني في ثانية
فجأة ألاقي نفس لفوق
أفرح وأزأطط وأروق
ويادوب أمشي خطوة اتنين
الا وألاقي ديل تعبان
ينزل بيه وويلي ويلين
وأصبح منصوب في خبر كان

لعبة تحير زي الدنيا
مالها أمان ..
ماهي لعبة عملها الانسان
من لوحة وزهرة وأشاطين
اللوحة دي دنيا ومفتوحة
بتحير رجالة ونسوان
وإنت ياجميل ترمي الزهرة
تيجي على واحد .. تيجي اتنين ..
حظك .. بختك .. يابو مخين
والاشاطين طالعين نازلين
ولانعرف رايحين على فين

ممكن تكسب لعبة في ثانية
ممكن تستناها سنين
ممكن تفضل تخسر تخسر
والكسبان زي الخسران
والسلم زي التعبان
ماعنتش أفرح بالسلم
ولا عنتش أزعل من التعبان
ماهي آخرتها بقت معروفة
تطوي اللوحة ..
ولا فيه سلم ولا تعبان .

آه ياعيني عليك ياإنسان
طول عمرك عايش غلبان
طول مابتهوى سراب أحلامك
طول مابتعشق وهم الدنيا
هتعيش وتموت زي الحيوان
بس الفرق انك بلسان
امتى تفوق بقا ياإنسان
دنيا عجيبة زمن تعبان .