مجلة رؤية قلم / في العنبوكة / بقلم / محمود مسعود / تحياتي وفاء غريب.....
في العنبوكة
ـــــــــــــــــــــــــــــــ
يابلدي ضيقتي
علي ابني وبنتي
الحال بقي فيكي صعب
وانتي اللي كنتي
ومازلتي أنتي
جوه القلب
فارده درعاتك للغريب
الكل في لحظة يبقالوا قريب
لكن يابلدي
مشورك بقي صعيب
زهرة شبابك علي القهاوي
واللي مش غاوي
جوه البيت مداري
بيخبي دموعه
نايم في سريره
أحلي سنين العمر
العواجيز خطفم مكانه
في الوزارة والإدارة
وبيحاربوه علي المرارة
اللي شاربها في كبره
مصدرينله دايما أزمات
يطلع من حفرة تقابله مطبات
ولما يجي يسافر
بعد ماعافر
واستلف من طوب الأرض
علي مركب جربانه
يتزنقله في خانه
علي أمل انه يوصل
لبلاد شبعانه
يدوبك يبدأ يبلع الريق
يلاقي نفسه في لحظه
مكتوب غريق
أو في العنبوكة
متهم وهو بريء
نفسه يبنيكي يابلدي
لكن سدين الطريق
في الآخر عايش في حريق
مابين أحلامه اللي راحت
وحياته اللي فجأة شاخت
وايه بإيده يعمله
وهو شايف أبوه بيسنده
لكن لإمتي
الحياه عنده معانده
كل شيء غالي
والقوت مهره عالي
ويدوبك بيهيم في الليالي
دموعه بتغسله
علي ذنب اتحطله
من مين مش عارف ...!!
ــــــــــــــــــــــــــــــــــــــــــــــــــــــــــــ
بقلمي / محمود مسعود ( عامية ) 23/9/2016م
ليست هناك تعليقات