مجلة رؤية قلم / قالوا لي / بقلم / الشاعر/ وحيدعلي محمدحسين / تحياتي وفاء غريب.....
قالوا لي
قالوا لي ليه مسافر
قلت لهم بفكر في بكرة
قالوا ليه مهاجر
قلت لهم إيه هايجرى
بكرة لما أرجع
هاتشوفوا حد تاني
مخلص مش أناني
واقعد فيها ليه
هي ادتني إيه
هي اداتك إيه
لا اداتك كتير
حاجات ما تتوصفش
كفاية الأمان
والحب والحنان
وضحكة امك وابوك
وجرانك بتوع زمان
ولا اختك واخوك
والناس اللي بيحبوك
وحبك الكبير
اللي في كل مكان
هاتسيبوا وترحل ليه
على بلاد ما تعرفهاش
ووشوش ماعشرتهاش
ده يسبك ويإذيك
وده يطلع غله فيك
ومين في بلاد الغربة
هاتعرفوا يحميك
من غدر الزمان
وقول لي بالله يا صاحبي
هاتعرف تنام
ولا ف شوارع الغربة
تايه وسط الزحام
على لقمة تسد جوعك
وشربة تبل ريقك
هو ده طريقك
يااااااه يا صاحبي يااااااه
هو ده منتهاك
عايش من غير هدف
ورايح تركب مركب
ف الميه تتحدف
يا خسارة يا ابن بلدي
ع اللي باع حياتة
وبأرخص تمن
امك وابوك ع الشط
عيونهم بتبكي عليك
ارجع بالله عليك
سؤال وهاسأل هولك
في الغربة هاتلاقي الدفا
والحب والوفا
ولا برد وجفا
أعقل يا صاحبي بقى
يا تروح معزز مكرم
ولا حد عليك يتأمر
ولا عايزنا نبكي
على جسمك المخرم
برصاص حرس الحدود
وريحة البارود
جوه قلبك نلاقيه
ويمكن ما نلاقيش
غير هدومك اللي عايمة
والميه سيباها ذكرى
للأجيال اللي جايه
قال ما تكلمونيش
ورفع شنطتة وقال
هنا مش عايز اعيش
ركب المركب خلاص
والمركب بعدت بيه
وامه من حرقتها
عماله تنده عليه
مافيش ساعات قليلة
إلا وجه الخبر
قالوا المركب بتغرق
والبحر عمال بيبلع
فيهم نفر نفر
أمه بقت بتصرخ
والدموع ملت العيون
وكل شيئ يهون
بس ابني يرجع ليه
واشوفه من حواليه
قالوا لها ابنك راح
كان بيعافر الموت
وجسمه كله جراح
على الزمن اللي راح
معاه ناس كتير
موتهم كان أليم
آخر حاجة شفناها
أيادي بتشاور لينا
وياريتنا مسكناها
كأنها بتودع
وبترمي السلام علينا
رسالة وبقولها للجميع
مهما ضاق الحال
أوعى تكفر بالله
دا ربنا اللي قال
مافيش حاجة محال
لو رمتها عليه
قول يارب دايماً
والخير بكرة تلاقيه
شعر/وحيدعلي محمدحسين
ليست هناك تعليقات