مين اللى قال حنان الام يتعوض
اللى قال كده كداب
اقولهاله وامضى تحتيها بالخط العريض
تلاقيه اصلا معاكس وشجاب
حنان الام ما يتعوضش ابدا
خد عندك انا مثلا
من يوم ما فراقتنى امى الحبيبة الدنيا ماسخة
ماسخة واحطلها سكر وهاتك يا تقليب
وافضل اقلب واقلب واقلب
راسها والف سيف ما تحليش
مصرة طعمها يبقى دعلب
واحد يقولك
حنان الام يتعوض لو لقيت حبيبة حبيبة
تحبك
وتحسك
تصدق قوى يعنى ف حبك
خد عندك
الحبيبة دى هتديك حنان زى حنان امك
لو ادتك حنان هيبقى مدفوع التمن
لو يوم قصرت حبة غصبك عنك
هتقولك عليك انا والزمن
وممكن تتهمك بالخيانة
وحاجات كتير
ما فيش اى مقارنة او تخيير
انا امى كات تدينى حنان ادمنت طعمه
طعمه حلو كده ربانى
ادمنته فربانى
كات تشوفنى بس كده متحير
تقولى مالك كده متغير
اقولها لا ولا حاجة
تقولى هو انا محتاجة
اعرف ايه فيك دانا ولدتك وربيتك وحاسة بيك
وتحايلنى وتلاعبنى
وتقولى اضحك يابنى
يلا قوم
قوام انسى الهموم
واضحك تقولى يدوم
وتحضرلى الهدوم
وتقولى روح هرج مع اصحابك
وارجع تستقبلنى بوصلة فرح
لحد اما اتعب وانام
ايييييييييه كانت ايام
ادفع عمرى لو ترجع
لكن اللى راح طبعا ما بيرجعش
عشان كده باقول لللى يقول حنان الام يتعوض
بص يا اخو حنان الام ما يتعوضش
ممكن اجزم واقول
اللى يقول كده اما مخبول
او معذور اتولد يتيم مثلا فمجربش
______________________
اللهم ارحم امى وكل الامهات الراحلين عن الدنيا جسدا
عبد الله الهوارى
ليست هناك تعليقات
إرسال تعليق