أوجاع شاعر كلمات / رضا أبو الغيط -- تحياتي جدو عبدو
أوجاع شاعر
كلمات / رضا أبو الغيط
÷÷÷÷÷÷÷÷÷÷÷÷÷÷÷÷÷
على الأوجاع أنا صابر
وأوجاعى ماهيش صابره
لاعارف عنها أتاخر
ولا...لاقى شعاع فكره
بقول الآهه وأسمعها
ف دنيا ..تقيله أوجاعها
فضلت العمر أنا أعافر
وأخرتها ...يضيع بكره
خطاوى العمر ومشيتها
لايوم كليت ..ولا مليت
وسرق الحزن... فرحتها
وطفى الشمع جوه البيت
وفات لى الدمع ع الخدين
وقلبى ملان.. آسى وأنين
لا دقت ف يوم حلاوتها
وف الفرحه أنا عزيت
أنا مليت ...ومش حابب
أكون واحد من الخدام
لدنيا .....صعب تصاحب
ولا لصاحب يبيعنى بكام
أنا ماشى ....ومش راجع
أنا عندى.... ميتين مانع
أعيش ف اللى بتتعاجب
بظلم .....سنينها والأيام
بشوف الكلمه مغلوبه
ومصلوبه على حيطانى
وقال لى الشعر ميت نوبه
يا ريت تكتب ومن تانى
لكن خايف ومش شايف
وريق الشعر صار ناشف
ومش لاقى كلام يوصف
أنين الجرح.. اللى بكانى
أنا الشاعر بخلق الله
وخلق الله ماحاسه بى
وفين ما بروح ألاقى الآه
بتدخل جوه سردابى
لا كاس الصبر صبرنى
ولا الأحزان بتعذرنى
وتاه منى كلامى إياه
ف كاس الصبر وعذابى
÷÷÷÷÷÷÷÷÷÷÷÷÷÷÷÷÷
ليست هناك تعليقات