خلي عندك دم ,, بـقلم الشاعر خالد حجاج

خلي عندك دم
بحبك خلي عندك دم
دا حبك في الحشا والدم
ويظهر ان حبي كبير 
شارد في الدروب مشاوير
فارد عمره ما يتلم
راسم في الخيال عودك
بغيرة الورد في خدودك
كانك شط مفتوحلي
كانك سر بيبوحلي
واني عبرت لحدودك
غريب وعرفت عنوانك
سكنت في قلب شطانك
بنادي الشمس من قدك 
ولون الورد من خدك
ولحن الحب في لسانك
ياحتة من جنون البحر
ولمسة من الجمال والسحر
جمالك شايفه في المية
بيرسم توهة في عنية
ويكسر جوا قلبي الصخر
دخلت الدنيا من بابك
لقيتها في طعم عنابك
عشقت السحر في عيونك
عشقت البحر وجنونك
ولعب المية في كعابك
خالد حجاج