أجمل ما فينا.. = بقلم أحمد جلال -- تحياتي جدو عبدو

أجمل ما فينا..

حاجات كتيييير مقدرش إنى أعدَّها..

لا الزمان يمحيها أو يقدر إنه يهدها..

التاريخ شاهد عليها..و الكتاب ذكر اسمها..

أرض الرسل و الأنبيا جنه للى يحبها..

النيل بيجرى فى دمنا ملامحنا دى تشبهلها..

هى دى اللى خدتنى منى هى دى اللى بحبها..

فيها قاهرة المُعِز فيها شرم الشيخ و سينا..

هى دى أجمل ما فينا..

فيها حى السيدة خان الخليلى و الحسين..

الأهرامات تاريخ بيحكى بالفخر للناس إحنا مين..

لسه ساكنه الطيبة فيها فى كل حارة و كل حى..

اسكندرية و بحرها ايُوه يا ناس ملهومش زى..

سيدى بشر و ابو العباس و اللى رايح و اللى جىّ..

السلطنة و استانلى مَغْنَى و فيها تشرب أحلى شىَ..

مصر فيها و فيها دايما حاجه بتحببنا فيها..

فيها خير مبينتهيش مهما سقف الشر يعلىَ..

فيها قُداس فى الكنيسة.. و فى المساجد قرآن بيُتلىَ..

فيها رحمة و ود يجمع فيها أحمد ويّا مينا..

فيها جندى ع الحدود زى الأسد شايل سلاحه..

فيها طالب مجتهد بالسهر يكتب نجاحه..

فيها مبتكرين و علماء رفعوا بره اسم مصر..

ليها بصمه فى كل دولة و كل شبر و كل عصر..

فيها عزة نفس هيبه شموخ بيحكى ألف نصر..

فيها رجالة الصعيد محفورين زى الوتد..

قبل ما تنادى تلاقيهم سيل يجيلك بالمدد..

من أسوان لاسكندرية هما دول رمز البلد..

فيها 100 مليون نَفَس يعشقوا نيلها و ترابها..

فيها كَرَم الكون بحاله للى بالذوق دق بابها..

شعب طيب بإختلافه...حَبُه أى حد شافه..

الست فيها و عبد الحليم...و الضحكة يرسمها الزعيم..

هى دى مصر الأبية هى دى أجمل ما فينا..

لو هقول الحق هوا..إن مصر أجمل ما فينا..

أحمد جلال 19\2\2016