( قراية فى دفاتر العشق وصفحات الوجع ) .. شعر عامية .. .. على سيد شحاتة .. تحيات جدو عبدو

مجموعة من قصائدى .. 

من ديوانى ( قراية فى دفاتر 

العشق وصفحات الوجع )

.. شعر عامية ..

.. على سيد شحاتة ..

ليلة ما أتخنق القَمَر

بحبال الورد.. والطين...

فــ بحر الليل

كان القَمَر سهران

ساكك العَتمَه

فــ وش الفجر

لمــا الضَـــيِّ

سرق مــ العِنين

نعاسه

اتحَنى الرمش

من بَرَه النـــن

إنجرح شوفــه

لمــا النهـــــود

عَصرت صوابع الغِيم

صرخت الديوك الدوَّاره

بين ضَفتين للوجَـع

اتنَطَر الفارس القديم

مــن فــوق الرهوان

تعبت المسافات

من تحت الحوافر

انشقـت السمــــا

عن أول الأنبيــا

زَفِّــت الملايكـه

عرايس الجَحِيم

الحلم.. كان نايم يتيم

فــ ركن الأوضه

الدافي..

رضعت القصايد

دموع الأهـــــات

اتكب فــ البحور

موال يتيم

غَنى الموج صبا

اتفرد ع الشطوط

جرح بايت

اتمدد النور

على حافة الصَبَّـار

اتهز عرش الملوك

كان الناموس

فارد جناحاته ع اللهب

ضامم فــ حضنه الشعاع

ناغز إبَره..

فــ وش الريح

عدى الجســر

فوق كعاب الخَلق

والسَطر..

خارج مــ البارات

يمسح دموع الفوانيس

انسطل.. على عتبة المقام

سره الباتع

أنجرح عود الياسمين

لمــا انقطف بإدين خشنه

اتنقض وضوه

داخ البـــــــاب

من تقل قفله المصدي

نــخ.. نــخ

من عند المفصلات

واتسند واقف

على رطوبة الحيطان

قَشَط البياض.. المملح

فـَـ انكشف بياض تاني عجوز

خباه الباب فــ عبُّه

انكسف تاني..

لمــا عورة الطوب النَيِّ

صَبحِت واضحه

فنـــام على جنبـه

- جنب السِفل -

وسند عقبه

على نص بلاطه.. مكسور

خلع الأراجوز من قلبه الأمانه

وعطاها لعيِّل صغَيَّر

كان بيضحك هوه راخر

من قلبه.. مرت السنيــن

شريط فيديو ع السريـــع

فبانت الصور..

مزحومه.. مقلوبه.. باهته

زايده فــ العَتمَه..

فقامــت القيـامــه...!!

ضيقة البَــراح

اتملا قلبي بالعِياط

وعنَيَّه برمد الحزن المر

ولســاني.. خاصم الكلام

لمـا داق طعم الأيام

طعم الأيام.. ما يسر

ضلمة السؤال

تلف دماغك بالحِيرَه

فتصبح روحك حَزينه

سَجينَه

رغم كل البراح

رغم كل السكون

الكون خانقك.. شانقـك

فــ عنقك..

يتصر

تضيق الخَنقَه عَليك

تتمدد عينيك

شلالين دمع متجمد

الزمن خَبى عَنَك صورتها

وسيرتها..

ســر.. ســر

تتسرسب حَواليك

كل الظنون

تحاول تعديها

تداويها.. وتديها

بعض من أحزانك

فَتفِر..

تتسبسب فــ عينيك

أحلامك القديمه

تتشعلق فــ أهدابك

تكنسهـــا برمـشـك

فتصير

كل الليالي.. توغوش

النوم يسجنك.. يحزنك

تحقنك

بمَصل.. كوابيس

ضــد الضــد

تجض.. تجض

تعض حِلمك فــ مقتل

يزرَق جرحَك

بلون غَطيــس

يحْمَر.. يصْفَر.. يخْضَر

إنكسارات غربة روحَك

فــ الزمن الصَعب

دوامــات.. لعبتها دماغك

أقدام بتدوس

ع النَفَس الباقِي

فــ صلب كيانك.. سوس

بينخر فــ عَضم الفِكــره

فتصيــر أفكارك فتافيـت

ينفخها الريح المُر

دقات طَبل الزَمَن

تملا طَبلِة وِدانَـك

تمــلاك بالضِيــق

لمــا وَرَق العُمــر

بيسقط من ع الحيط

ورقَه.. ورقَه

والورق الساقط

يكتر.. يكتر

رغم الزمان الرَدي

وخَرَس الكَلام

وصَريخ السكوت

وطيف الحقايــق..

المتشعبط

فــ زعابيب الريح

وهجير القحط

أروي تربة حِلمك

بدمعك.. بعرقك.. بدمك

تخضر

مد دراعاتك..

مداري

زيح بشوكها

خنقاتك

وعبي صدرك

بكل نسايم الكون

شهيق ع الآخـــر

وانشب ضلوعك – ضوافر –

وعافر

وصــر.. صــر

صــررررررررر...!!

جوع البحر وعَطَشُه

وإيه اسميكي..؟!

غُلبت فــ اساميكي

اسميكي لِيلي ولاَّ نهاري

مستحيلي.. ولاَّ انهيــاري

جَنِّتي.. جِنِيِّتي.. ملاكي

هلاكي.. ناري

يا روح الروح.. مــ البوح

صوتي مَبحوح

نِدايــا جوَّايــا

غُنايــا مَدبوح

لا غنوه تِحلالي

ولا ليالي..

قَمري العالي

إن يلالي

ي

خوفني.. يخطفني.. يحدفني

فــ بحور العَتمَه

لِساهــا الجِنِيَّه كاتمه

سـر مــوت النوارس

فــ بحــور التـيــه

حِلمي أناديه

مَر زمن الفوارس

مُرْ يا زمن الكوارث

أعطش.. يسقيني البحر

مِلح الأمنيات..!!

أجوع..

والرجوع صعب ومستحيل

الدوّامَه متاهه..

توَّاهه.. توَّاهه...

الدمُـوع نَدَّاهــه...!!

سَاعة الرحيل

بتقطعني من جوَّايا

وتعَري حروفي

وتبان.. سطر جبان

يوَغْوِش...

نَضرُه مِدغشش، ومنشش

دبان خوفي وِسع المَدى

الحرف المبتدا

لمــا ابتدى.. كان شخابيط

ما حَاشُه.. ضباب الطريق

لِسَّــاه الغَريق

بيتعَلق فــ قَشَه

والقشه.. خاشه

فــ الغَويط

البَحر عَبيط

مع إنه حَويـط مـا عَدانــي

والموجَه العُوجَه معانداني

تمص فــ عِيداني

تبلعنــي محـيــط

تبلعني..!!

تبلعني...!!

تبـ ـ ـ لعـ ـ ـ ني....!!