عشان ننسى كلمات / رضا أبو الغيط
عشان ننسى
كلمات / رضا أبو الغيط
*****************
عشان ننسى دموع عينا
وننسى ألمنا وجراحنا
عشان بكره اللى جاى يجرى
ونفسه ف يوم يريحنا
لازم بدرى ...ونور فجرى
يمد ايديه........ ويحضنا
ويرجع لينا من تانى
وبكتافه يشيل عنا
شواشى الحزن اللى منعانا
وحيشانا نكون كان
ولا حتى خوات إن
عشان الآهه ما تعاود
تعذبنا وتوجعنا
وندمن جرحنا النافذ
ف لحم الحى وضلوعنا
لازمنا نهار يكون فارد
ضيا بكره على شراعنا
وطرح الفرح يهوانا
ويلقانا.... ف مطرحنا
يشد العود وأوتارنا
ويعزف لحنه من تانى
ومن تانى يفرحنا
لازمنا نشوف بعين حابه
تشوف بكره ف أحضنا
وتلضمنا
ف عُقد الصبح حباته
وتستنى
توضينا من ندى صابح
حدا غيطانا
ولو حابه الحياه حبه
ما تبكى ماضى أحزانا
وتعشق ف الحياه شابه
ولو شابت.... ودابت فينا أيامنا
وأحلمنا تبات تحلم
توصلنا
على المرسى
وتنسى الحزن ودموعنا
ولو فاكر تقول انسى
هموم ماضى ماهوش راضى
يفوت البر والمرسى
عشان ننسى هموم باتت
على قلوبنا ليالى طوال
هموم عاشت على كتافنا
بتقل جبال
عشان نلقى ف ايامنا
ميتين ضحكه وراحة بال
لازمنا نرجع الايام وم الأول
نعيش أطفال
ليست هناك تعليقات