الشوارع
كلمات / رضا أبو الغيط
******************
الشوارع.. هى هى
والأماكن..,والقاسيه
لسه فيها الحزن ساكن
جوه قلبى وف عينيا
لسه عنها الفرح غايب
لسه مش لاقيه الحبايب
واللى حاضر واللى غايب
السعاده عنه دايما مداريه
تايهه فينا.....وتايهه بينا
ويا... أحلامنا الحزينه
بنداريها وتدارينا
والهموم أهى جايه جايه
مهما أحاول انسى همى
وأستخبى ف حُضن أمى
بألقى خوفى جوه دمى
وألقى حُزن الدنيا فيا
نفسى أرسى ف أى مرسى
وأنسى جرحى اللى ف ضلوعى
وأحضن الأيام وأنسى
مُر كاسى.. وطعم جوعى
نفسى مره واحده أرسى
وألقى ليا أى مرسى
نفسى مره واحده أنسى
كل أوجاعى العافيه
بس خايف.. أصلى شايف
دمعه فاتت نن عينى
نازله علقم ع الشفايف
فيها جرحى من سنينى
الشوارع لسه فاضيه
مش ماليها غير دموعنا
لسه رافضه تبقى راضيه
تحض الفرح وشموعنا
الأماكن مش بتسأل
ع اللى فيها وع اللى فاتها
والهموم عماله تتقل
تملا كاسى من عذابها
لسه خايف م الشوارع
اللى سكناها المواجع
اسه خايف م الأماكن
اللى فيها حلمى ضايع
رضا أبو الغيط
ليست هناك تعليقات
إرسال تعليق