(( كان شيئ ما بينا ها ينكسر )) للشاعر ~~~~ رضا ابو الغيط
كان شيئ ما بينا ها ينكسر
كلمات / رضا أبو الغيط
*********************
م البرد ايدى مخشبه
مش قادره تمسك بالقلم
وف عقلى حبة كركبه
صعب ان أفوتها تنظلم
ولعت ف المنقد خشب
دخانه كان ليه العجب
طاير ف قاعة عُمرنا
عامل كده زى السُحب
طالع بيترقص على
عرشى اللى دايب م المطر
من طاقه كات ف المندره
هرب الدخان فوق الشجر
ودفست كنكنه ف ولعتى
من بعد م الفكر اترسم
وف ضى زاين شمعتى
بدأت احسس ع القلم
وصيته يكتب من سكات
عن ماضى كات فيه البنات
عواطفها داخل قلبها
محبوسه وليوم الممات
راضيه تملى بحظها
ومأمنه دايما بالنصيب
راجلها.. أبوها وابنها
وف قلبها هو الحبيب
وسألته فين راح الحنان
والفرق بينا وبين زمان
لساه معشش ف القلوب
ولا بقى... زى الدخان
ولقيت كلامى شخبطه
وايديا رجعت ترتعش
م البرد.... أو م اللغبطه
فقلت لازم أنتعش
شديت بإيدى مشنتى
كات ف انتظارى م الفطار
ومعاها جبنة زعلتى
وقرن فلفل ..حامى نار
وبدأت أسرح ف البشر
وف زوجه فاتت عِشها
ليه القلوب صبحت حجر
والبنت مش زى أمها
وقبل قلبى ما ينحسر
على شيئ ما بينا ها ينكسر
لقيتها جايه وف خجل
بتقول.. دارينا م المطر
الود بينا ها يتصل
ونعيش سوا على عًهدنا
ما هو صعب عنك انفصل
وف بطنى منك حلمنا
وبلمسه منها ع الحيطان
عادت لبيتى الكهربا
وف حضن مليان بالحنان
عادتلى أيام الصبا
من غير مولع منقدى
جسم النحيف حس بدفا
وبإيدها مسحت دمعتى
والقلب عاد ليه الصفا
وكتبت تانى بالقلم
سهل الحياه تضحكلنا
لو يوم ها نشعر بالندم
أو إعترفنا بذنبنا
ليست هناك تعليقات