رسالة ليكو يا أهل مصر = خواطر أخيكم محمود محمدي العجواني -- تحياتي جدو عبدو
رسالة ليكو يا أهل مصر
إفشوا السلام وسلموا على بعضكم
دا الدنيا لو مفيهاش سلام
يبقى على الدنيا السلام
ولي خلقنا اسمه السلام
ولي أمرنا بالسلام اسمه السلام
وف الآخرة جنة ربنا دار السلام
وإن جه ف يوم خاطبك جهول
ربك بقولك قول سلام
ولي بيدخل أرض مصر
ربك بقولك له سلام
حرك لسانك بالسلام
تاخد أجور على الكلام
تلاتين من الحسنات تاخدها
على التحية بالسلام
وإن كان ف يوم دخل الشيطان
وخلى بينا كمان خصام
نبينا قال لو اتقابلنا
لازم يكون بينا السلام
وإن زاد خصامنا يومين تلاتة
يبقى عملنا عليه السلام
إخزي الشيطان وقول السلام
علشان نعيشوا في الأمان
معقول نعيشوا في السلام
مع اسرائيل والأمريكان
ويبقى بينا احنا الخصام
ونقطعوا الأرحام كمان
والواد يعادي كمان أخوه
ويلعن جدود ال جابوه
ما بلاش تقولي أنت فلول
ولا من الإخوان أقول
هوا احنا مش من اهل مصر
عايشين حياتنا ف وش بعض
وبنضحكوا مع بعضنا
في الفرحة شركا وحزننا
ومفيش ضغينة ف قلبنا
ورغيف وملح بلمنا
ما كفاية يا اخوانا كده
دا بلدنا هتضيع مننا
وساعتها مش هيفيد ندم
وهنبكوا دم بدمعنا
يالا يا خويا هات إيدينا ف بعضها
يالا نقوموا نسلموا على بعضنا
دا الدنيا لو مفيهاش سلام
يبقى على الدنيا السلام
إفشوا السلام واختشوا على دمكم
وبلاش تعادوا لبعضكم
اوعى تقول الدولة دي من حقنا
دا مصر لينا كلنا
مسلم وقبطي كلنا عايشين هنا
بنشوفوا بعض نسلموا على بعضنا
عايشين جيران وبلدنا ساكنه ف قلبنا
فاكرين عبورنا كلنا
وجيشنا حرر أرضنا
وما كانش فيه انت وانا
النصر جه من ربنا
خواطر أخيكم
محمود محمدي العجواني
ليست هناك تعليقات